Wednesday, 26 March 2014

அறிவுகெட்ட

உன்னை நான் காதலிச்சேன்.
என்னை நீ காதலிச்ச.
எனக்குப் பிடிச்சது
உனக்குப் பிடிச்சது.
கல்யாணம் பண்ணிக்கலாம்னு
திட்டம் போட்டோம்.
நீயும்தான் சரின்னு சொன்ன.

அடி பாதகத்தி
காதலுல வந்த சின்ன சின்ன
சண்டைகள் எல்லாம்
அன்பின் தடயம்னு
நானும்தான் நம்பி இருந்தேன்
உன்னோட கோவத்தை எல்லாம்
பாசம்னு கதை படிச்சேன்

போராடி வீட்டுல வாங்கிய
சம்மதம் வைச்சி
போட்டேன் மூணு முடிச்சி
நம்ம சந்தோசத்துக்கு
பெரிய வலை விரிச்சி
நீயும்தான் கழுத்து நீட்டின

என்னைவிட நீ பெரிய படிப்பு
என்னைவிட நீ பெரிய பதவி
என்னைவிட நீ பேரழகி
எப்பவுமே பேதம் பாக்கலையே
இதையெல்லாம் என்கிட்டே
ஒருபோதும் நீ கேட்கலையே

ஆத்தாடி நீயும் என்
ஆசைநாயகி ஆன பின்னே
எல்லாமும் வித்தியாசம் ஆகுமா
இதையே ஒரு காரணம்
என நீ சொன்னா தகுமா

உன்னோட சேவகனா
நான் கிடக்கேன்
என்னை நீயும்
கை வுட்ராதே
கைகட்டி நானும் நிக்கிறேன்
உன் கண் பார்வையில்
இருந்து என்னை ஒதுக்காதே
பலமுறை கேட்டாலும்
படுபாவி உன் காது செவிடா

பாவ புண்ணியம் பாக்காம
கோர்ட் வாசப்படி
மிதிக்க வைச்சே
உன்னை கொடுமை
படுத்துறேனு கொடி பிடிச்ச
படிப்பு, பதவின்னு
சொல்லி வைச்ச

சண்டாள பயபுள்ளைக
உண்மை தெரியாம
நீதி சொன்னாக
இதை சரித்திரத்தில
தப்பாக குறிச்சி வைப்பாங்களே

எல்லாம் இந்த
அறிவுகெட்ட






Post a Comment

Friday, 14 March 2014

அவள் என்னை ஒதுக்கினாள்

என்னை உங்களுக்கு நினைவு இருக்குமா என தெரியாது. நான், என் மாமா மகள், என் மனைவி, என்னுடன் வேலை பார்த்த பெண் அப்புறம் புதிதாக பக்கத்து அலுவலகத்தில் வந்து சேர்ந்த பெண் என மூன்று வருடங்கள் முன்னர் ஒரு சின்ன கதை சொல்லி இருந்தேன். அந்த கதைக்கு அப்புறம் என்னைப் பற்றி சொல்ல வேண்டிய நிர்பந்தம் ஏதும் வரவில்லை. ஆனால் இப்போது ஒரே ஒரு தடவை மட்டும் பேசிவிட்டு சென்று விடலாம் என இருக்கிறேன். மீண்டும் எப்போது நான் வருவேன் என எனக்குத் தெரியாது. இனிமேல் இது குறித்து நான் உங்களிடம் சொல்லாமலே போகலாம்.

கல்யாணம் ஆகி நான்கே வருடங்கள் தான் ஆகி இருந்தது. ஒரு மகள் பிறந்து ஓராண்டு முடிந்து இருந்தது. புதிதாக பக்கத்து அலுவலகத்தில் வந்து சேர்ந்த பெண்ணின் மீதான காதல் துளிர் விட்டதும் என்னுடன் வேலை பார்த்த பெண்ணின் காதலை உணர்ந்து இருந்தேன். அன்று இரவு மனைவியிடம் எனக்கு நேர்ந்து இருக்கும் விஷயத்தை சொன்னதும் நீங்கள் நம்பினால் நம்புங்கள், கையில் கிடைத்த பாத்திரத்தை எடுத்து எனது தலையில் ஓங்கி அடித்து விட்டாள். எனக்கு வலி பொறுக்க இயலவில்லை. தலை புடைத்து வீங்கி நின்றது.

'ஏன்டா, கட்டின பொண்டாட்டி நான் இருக்க இன்னொருத்தி மேல காதல்னு சூடு சொரணை இல்லாம அதுவும் என்கிட்டே வந்து சொல்வ' அதுதான் முதல் தடவை என் மனைவி என் மீது இத்தனை அளவுக்கு அதிகமான அகங்காரம் கொண்டது.

அன்று இரவு முழுவதும் விசும்பிக் கொண்டு இருந்தாள். 'எடுபட்ட பயலே, இனிமே எவளைப் பத்தியாவது பேசின உன்னை கொலை பண்ண கூட தயங்கமாட்டேன். உன்னை நம்பி தனிக்குடித்தனம் வந்தேன் பாரு, அது என் தப்பு தான். நானும் வேலைக்குப் போய் நாலு காசு சம்பாரிச்சு தனிச்சி வாழுறேன் பாரு' என்று அந்த விசும்பலின் ஊடே சொல்லிக் கொண்டு இருந்தவள் எப்போது தூங்கினாள் எனத் தெரியாது. காலையில் அவளைப் பார்த்தபோது அவளது கண்கள் எல்லாம் வீங்கி இருந்தது. கொஞ்சமும் கோபம் குறையாமல் இருந்தாள். நான் என் தலை வீக்கம் குறையட்டும் என மூன்று நாட்கள் வேலைக்கு விடுப்பு எடுத்தேன். எத்தனையோ சமாதானம் பண்ணிப் பார்த்தேன். ஆனால் அவள் கொஞ்சமும் கேட்பதாக இல்லை.

கொஞ்சம் வீக்கம் அன்றே குறைந்துவிட்டது. கடைக்கு சென்று சாப்பிடலாம்  வா என அழைத்தேன். 'ஏன் அவளுக எவளாச்சும் அங்க வரேன்னு சொல்லி இருக்காளுகளா' என்று அவளே அவர்களை பற்றி பேசினாள். நான் இல்லை என்று சொல்லிவிட்டு அதிகம் பேசவில்லை. இங்க பாரு, நீயில்லாம எனக்கு வேறு யாரும் இல்லை. ஏதோ புத்தி கொஞ்சம் புரண்டு போச்சு, இனிமே இப்படி நடக்கமாட்டேன் என்று இத்தோடு ஆயிரம் தடவை மேல் சொல்லி இருப்பேன்.

'உன்னை நம்பி எப்படி இருக்கிறது, அன்னைக்கே அந்த சிறுக்கி வீட்டுக்கு வந்தப்ப காலை வெட்டி அனுப்பி இருக்கணும். நீ எவளோடையும் போயிர கூடாதேனுதான் நான் உன்னோட உறவு வைக்க சம்மதிச்சேன். ஆனா நீ இப்ப காதல்னு சொல்லிட்டு கண்டவளோட அலைய ஆசைப்படற. உனக்கு இனிமே என்னோட உறவு கிடையாது, ஒட்டும் கிடையாது. அப்படி உனக்கு சுகம் தேவைப்பட்டுச்சினா அதான் இருக்காளுக அந்த ரெண்டு பேரு, அவள்கிட்ட போ' இப்படி எல்லாம் வார்த்தைகளை அவள் உதிர்த்து கொட்டுவாள் என ஒருபோதும் நான் நினைத்ததே இல்லை. அவளின் கோபம் தணியும் என்றே பார்த்தேன். ஆனால் வாரம் ஆகியது. கோபத்தை குறைத்துக் கொள்ளவே இல்லை.

ஒரு சின்ன விசயத்துக்கு இத்தனை தண்டனையா என என்னை நானே நொந்து கொண்டேன். ஒரு மாதம் கடந்து போனது. அவள் சொன்ன வார்த்தையில் உறுதியாக இருந்தாள். அவளை கல்யாணம் கட்டியபோது எப்படி என்னை பிரமச்சரியம் அனுபவிக்க வைத்தாளோ அதைப்போலவே இப்போதும் என்னை அனுபவிக்க வைத்துக் கொண்டிருந்தாள். இந்த சூழல் காரணமாக நான் பக்கத்து அலுவலக பெண்ணை மட்டுமல்ல எந்த பெண்ணையும் ஏறெடுத்து பார்ப்பதை தவிர்த்து இருந்தேன்.

எனக்கு வேலை கிடைச்சிருக்கு. உன் அம்மாகிட்ட பேசினேன், அவங்க வரமுடியாதுன்னு சொல்லிட்டாங்க, என்னோட அம்மாவும் அப்பாவும் நம்மளோட தங்கி இருப்பாங்க என சொன்னதும் எனக்கு மறுத்து பேச மனம் வரவில்லை. உன் விருப்பப்படியே செய் என சொல்லிவிட்டு வேலைக்கு செல்வது வீட்டுக்கு வருவது மகளுடன் கொஞ்சி விளையாடுவது என்று இருந்தேன். அவள் முகம் கொடுத்து கூட பேச மறுத்தாள். நம்பிக்கை போய்விட்டது என்றால் அதை திரும்ப பெறுவது மிகவும் கடினம் என்பதை உணர்ந்து கொண்டு இருந்தேன்.

அன்று அலுவலகத்திற்கு என்னுடன் முன்னால் வேலை பார்த்த பெண் வந்து இருந்தாள். வீட்டில் உள்ள பிரச்சினையை சொன்னேன். அவளை விவாகரத்து பண்ணிட்டு என்னோட வந்துரு, எதுக்கு இப்படி உன்னோட இளமை காலத்தை வீண் பண்ற, உன்னை நான் நல்லா பாத்துப்பேன் என்று காதல் மொழி பேசினாள். அதில் நான் கரைந்துவிடாது இருந்தேன். இல்லை இனிமே என்னோட நீ பேசாத, என்னை பார்க்க வராதே அதுதான் உனக்கும் எனக்கும் நல்லது. நீ வேற யாரையாவது கல்யாணம் பண்ணிக்கோ என சொன்னதும் அலுவலகத்தில் மற்றவர்கள் இருக்கிறார்கள் என்பதை கூட பொருட்படுத்தாமல் அவளது காலில் இருந்த செருப்பை கழட்டி எனது கன்னத்தில் ஓங்கி அறைந்தாள். 'சீ நீயெல்லாம் ஒரு நண்பன்னு பேச வந்தேன் பாரு, உன் பொண்டாட்டிக்கு பதிலா என்னை உன் பொண்டாட்டியாக்க எத்தனை கேவலமா பேசுவ என சொல்லிவிட்டு போய்விட்டாள். நான் குற்றுயிராய் நின்று இருந்தேன். நடந்தது வேறு என அங்கிருப்பவர்களிடம் சொல்லக்கூட என்னால் முடியவில்லை. எல்லோரும் என்னை கேவலமாக பார்ப்பது போன்று தோன்றியது. அடுத்த இரண்டு வாரங்களில் நான் வேறு வேலை மாறி இருந்தேன்.

எனது மனைவியும் வேலைக்கு சேர்ந்து இருந்தாள், என் மாமியார், மாமனார் வீட்டுக்கு வந்து சேர்ந்து விட்டார்கள். அவர்கள் முன்னால் சிரித்து பேசுவது போல நடிப்பாள், ஆனால் தூங்க செல்லும்போது மகளை எங்கள் இருவருக்கும் இடையில் தூங்க வைத்தே தூங்குவாள். தாம்பத்யம் என்பதை மறந்து இரண்டு மாதங்கள் ஆகி இருந்தது. இந்த காம இச்சையை எத்தனை சாதுர்யமாக கட்டுப்படுத்திக் கொண்டு இருக்கிறாள் என என்னால் கொஞ்சம் கூட நம்ப இயலவில்லை. நானும் அவளின் உணர்வுகளை மதித்து அதிகம் தொந்தரவு தராமல் இருந்தேன்.

ஆனால் ஓர் இரவு என்னால் பொறுத்து கொள்ள இயலாமல் அவளிடம் கெஞ்சினேன். இதுவரை என்னால் எந்த பிரச்சினையும் இல்லை என மன்றாடி அவளுடன் உறவு கொண்டேன். அவள் எந்த உணர்ச்சியும் காட்டாமல் இருந்தாள். விருப்பம் இல்லையா என்றே கேட்டு வைக்க, உனக்கு சுகம் கிடைச்சா போதும்ல என சொல்லிவிட்டு என் வாய் அடைத்தாள். எப்படி இப்படி காம இச்சை இன்றி இவள் போக கூடும்.

ஒரு மருத்துவரை அணுகினேன். மொத்தமாக அனைத்து கதையையும் கூறி முடித்ததும் அடுத்த வாரம் வா  என சொல்லி அனுப்பினார். எனக்கு காம இச்சை தோன்றும்போது அவளை பணிய வைத்தேன். அவளும் எவ்வித உணர்வு இன்றி சரி என்றே இணைந்தாள். எனக்கு இந்த பிரச்சினைக்கு முன்னால் அவள் நடந்து கொண்ட விதமும், இப்போது நடந்து கொண்டு இருக்கும் விதமும் வித்தியாசமாக இருந்தது. அடுத்த வாரம் சென்றபோது என்ன நடந்தது என கேட்டார். சொன்னேன். சில மாதங்கள் பின்னர் அழைத்தார், சென்றேன். ஒருமுறை கூட அவளாக காம இச்சை கொண்டு என்னை அணுகவில்லை என சொன்னேன். உங்ககிட்ட சில விசயங்கள் பேசணும் என மாலை பூங்காவிற்கு வர சொன்னார். சென்றேன்.

'உங்க மேல உங்க மனைவிக்கு நம்பிக்கை இல்லை. அந்த நம்பிக்கை இனிமே வருமான்னு சொல்லவும் முடியாது. அவங்களுக்கு காம இச்சை இருந்தாலும் அதை தீர்த்துக்கொள்ள நீங்கதான் வழி. ஆனாலும் அந்த காம இச்சையை எளிதாக நீங்கள் நடந்து கொண்ட நம்பிக்கை துரோகத்தை நினைச்சி அவங்களால கட்டுபடுத்திக்கொள்ள முடிகிறது. அதே நேரத்தில் உங்களை அவங்க இழக்கவும் விரும்பலை, அதனால நீங்க விரும்பற நேரம் எல்லாம் உங்களோட ஆசையை பூர்த்தி செஞ்சா போதும்னு இந்த விசயத்தில நடந்துக்கிறாங்க. நீங்க உங்க காம இச்சையை குறைக்கணும், அவங்களே உங்களை விரும்பி வரணும். அதுக்கு இன்னைக்குல இருந்து அவங்களுக்கு பிடிச்ச மாதிரி நடந்துக்குங்க. குறைவில்லாத அன்பு, எந்த விசயத்துக்கும் சத்தம் போடாம இருப்பது மாதிரி நீங்க நடந்துக்கோங்க. இதுதான் நீங்க கடைபிடிக்க வேண்டியது. காமம் அல்லாத காதலை நீங்க அவங்ககிட்ட தந்தால் ஒழிய உங்களால உங்க மனைவியை நீங்க திரும்ப பெற இயலாது.

பெரும்பாலான ஆண்கள் தங்களோட காம இச்சை தீர்ந்தா போதும்னு நடந்துக்குவாங்க, மனைவியோட மனசை அவங்க புரிஞ்சிக்கிறதே இல்லை. மனைவி உறவுக்கு சம்மதிக்கிறானு எல்லாம் நல்லா இருக்குணு நம்பி வாழ்க்கையை ஒரு ஏமாத்தமா நடத்துறது இந்த உலகத்தில் வாடிக்கை. ஆனா நீங்க அப்படி வாழ வேண்டாம்னு சொல்றேன். அன்னியோனியம் அப்படிங்கிறது இரண்டு மனசு சேர்ந்து வரது. அந்த காலத்தில் மட்டுமல்ல இந்த காலத்திலும் தாசி முறை, விபச்சாரம் எல்லாம் ஒரு ஆணுக்கு காம இச்சை தீர்க்கும் வழின்னு வைச்சிட்டாங்க. பெண்ணுக்கு காம இச்சை இல்லாமலா இருக்கும். இதுவே நீங்க உங்க மனைவிக்கு முன்னால வேற யாருகிட்டயாவது உறவு வைச்சீங்களா, இல்லையே. எப்படி அப்போ கட்டுபாடா இருக்க முடிஞ்சது.

பாலினத்தை தீர்மானிக்கிற குரோமசோம்கள் முதற்கொண்டு காம இச்சையை தீர்மானிக்கிற ஹார்மோன்கள் இருப்பதாகவே அறிவியல் உலகம் நம்புறது. பாலின ஹார்மோன்கள் பெண்கள் பருவம் அடையறப்ப பிட்யூட்டரி சுரப்பி  மூலம் இந்த இரண்டு Luteinising Hormone (LH) and Follicle Stimulating Hormone (FSH)  சுரக்கிறது.  கருமுட்டை உற்பத்தி பண்ற இடத்தில் இருந்து  oestrogen and progesterone சுரக்கிறது. இந்த நிலையில் தான் ஒரு பெண் என்பவளோட உடலில் எல்லா மாற்றங்களும் உருவாகிறது. மார்பகங்கள் வளர்ச்சி முதற்கொண்டு, மாதவிடாய் காலங்கள் எல்லாம்  இந்த நிலைக்கு அப்புறம்தான். இதே மாதிரி ஆண்களிலும் LH, FSH சுரக்கிறது. ஆனால் விரைப்பையில் இருந்து testosterone சுரப்பதன் மூலம் தான் ஒரு ஆண், ஆண் தன்மையை பெறுகிறான். மீசை வளர்ச்சி முதற்கொண்டு. இந்த testosterone பெண்களிலும் எட்டு மடங்கு ஆணை விட குறைவாகவே சுரக்கிறது.

எல்லா விலங்கினங்களும் தாங்கள் உறவு கொள்ள தயாராக இருக்கிறோம் அப்படின்னு ஒரு குறிப்பு உணர்த்தும். அதைப்போலவே மனிதர்கள் உணர்த்துவாங்க. பொதுவா பெண்கள் மாதவிடாய் தொடங்கிய காலத்தில் இருந்து பதினாலாவது நாள் கருமுட்டை வெளியேறும். அந்த கருமுட்டை வெளியேறும் ஆறு நாட்கள் முன்னர், ஆறு நாட்கள் பின்னர் வரை அவர்களுக்குள் காம இச்சை அதிகமாக இருக்கும். அப்போது அவர்களின் நடவடிக்கை எல்லாம் கவனித்தால் ஒரு மாற்றம் இருக்கும் என்றே சில ஆராய்ச்சி முடிவுகளில் சொல்றாங்க. அதே வேளையில் இப்படி கருமுட்டை வெளியாகும் தருணத்தை வைத்து ஒரு பெண்ணின் காம இச்சையை கணிப்பது தவறுன்னு சொல்றாங்க. இப்படி ஆய்வக முடிவுகள் எல்லாம் வைத்து ஒரு உறவின் காம இச்சையை தீர்மானிக்ககூடாதுன்னு சொல்வாங்க. இப்போ உங்க வாழ்க்கையே ஒரு உதாரணம். உங்க மனைவிக்கு காம இச்சை குறைந்து போனதற்கு காரணம் அவங்களோட ஹார்மோன்கள் பிரச்சினை இல்லை. நீங்கதான்.

இப்படித்தான் 66 தம்பதிகளை தேர்ந்தெடுத்து பெண்களிடம் அவங்க ஆண்கள் கிட்ட என்ன பிடிக்கும்னும் இன்னொருத்தர் கிட்ட என்ன பிடிக்கும்னு கருமுட்டை வெளியாகும் தருணம் , கருமுட்டை வெளியாகாத தருணங்களில் ஒருவரோட அறிவு, புகைப்படம், மேலும் சில உடல் வடிவமைப்புகள் கொடுத்தாங்க. அதாவது ஒரு பெண் 66 ஆண்களை பார்த்து எப்படி நினைக்கிறாங்கன்னு சொல்லணும். நம்ம ஊருனா என்ன பொழப்புன்னு சொல்லிட்டு போயிருவாங்க. ஆனா அந்த ஆராய்ச்சி முடிவு என்ன சொன்னதுன்னா எந்த பெண்ணும் ஒரு ஆணின் அறிவு குறித்து காம இச்சை கொள்வதில்லை. மாறாக ஆணின் தோற்றத்தை கொண்டு காம இச்சை இந்த கருமுட்டை வெளியாகும் தருணத்தில் இருந்ததுன்னு கண்டுபிடிச்சாங்க. இதே மாதிரி வேறொரு ஆராய்ச்சியில் பெண் தான் கருமுட்டை வெளியாகும் தருணத்தில் கொஞ்ச நாள் உறவுக்கு ஏற்ற கொஞ்சம் கரடு முரடான தசைப்பிடிப்புள்ள ஆணையும், கருமுட்டை வெளியாகத தருணத்தில் அன்பு உள்ள ஆணை நெடுநாள் அவர்களுடன்  இருக்க வேண்டும் எனும் எண்ணம் ஏற்பட்டதா சொல்றாங்க. அதாவது காம இச்சை அற்று.

இப்ப பெண்கள் கரு தடுப்பு மாத்திரைகள் உட்கொண்டால் இந்த கருமுட்டை வெளியாகும் உணர்வுகள் எல்லாம் மறைந்து போனதா சொன்னாங்க. ஆனால் ஆண்களுக்கு இது போன்ற ஹார்மோன்கள் பிரச்சினை இல்லை என்றாலும் வயது ஆக ஆக testosterone அளவு குறைய அவர்களின் காம இச்சை குறையும்னு சொன்னாங்க. காம இச்சை அற்ற ஆண்கள் உண்டு என்பது அவங்களோட எண்ணம்.

இந்த மொத்த ஆராய்ச்சி தப்புன்னு சொல்லி கருமுட்டை உருவாகும் தருணத்தில் பெண்கள் நன்றாக ஆடை உடுத்துவார்கள் என்றெல்லாம் சொன்னாங்க. கிராமப்புறம் எல்லாம் இதை சொன்னா ச்சீ கருமம் என்றே போயிருவாங்க. இதில் கலாச்சாரம் எல்லாம் நிறைய பங்கு பெறுது. தங்களோட ஆசைகளை மனதில் அடக்கி கொள்ளும் பெண்களே அதிகம்.

ஒரு பெண் கோபமாக அழுது கொண்டு தலைவலியுடன் இருக்கும்போது காம இச்சையை நினைத்துக்கூட மாட்டார். பெரும்பாலான பெண்கள் இந்த காம இச்சை குறைவிற்கு அவர்களது ஹார்மோன்கள் என்றே எண்ணுகிறார்கள். ஆனா நிறைய பேருக்கு இந்த ஹார்மோன்கள் பத்தி எல்லாம் தெரியாது கூட.

யாரிடமாவது நீங்க போய் எப்ப காம இச்சையுடன் கவர்ச்சியா உணருறீங்கனு  கேட்டா அவங்களால உறுதியா சொல்ல முடியாது. ஒரு ஆணின் அல்லது பெண்ணின் இன உறுப்பில் ஏற்படும் எழுச்சிக்கும், உச்ச நிலைக்கும் காம இச்சைக்கும் வேறுபாடு உண்டு. அதாவது சுய இன்பம் மூலம் ஒரு பெண்ணோ ஆணோ தனது உச்சத்தை அடைந்து கொள்ளலாம், ஆனால் இன்னொருவருடன் உடல் உறவு கொள்ளும் காம இச்சை என்பது அத்தனை எளிதாக தோன்றுவது இல்லை. காம இச்சையே இல்லாத ஆணோ, பெண்ணோ எப்படி காம இச்சைக்கு உட்படுத்துவது என்பது குறித்து மருத்துவ உலகம் அதிக செலவு செய்யவில்லை. வயாகரா மாத்திரை ஆணின் இன உறுப்பின் எழுச்சிக்காக உருவாக்கப்பட்டது, காம இச்சைக்கு என்று இல்லை.

oestrogen காம இச்சையை அதிகரிக்காது காம இச்சையை ஆண் பெண் இருவருக்கும் அதிகரிக்க செய்வது testosterone என முப்பது ஆண்டுக முன்னர் ஒரு பெண் சொன்னாங்க. கடந்த 40 வருடம் பெண்ணுக்கு testosterone கொடுத்து காம இச்சை அதிகரிக்குமா என பார்த்தபோது அந்த பெண்ணின் இன உறுப்பி மட்டுமே மாற்றம் ஏற்பட்டது. காம இச்சை மாறாது இருந்தது.

இந்த காம இச்சை அதிகரிப்பது நமது எண்ணம் சார்ந்தது என கூறி இருக்காங்க. ஒரு பெண் தாய் ஆனபின்னர் காம இச்சை குறையும், இப்படி நிறைய காரணம்  இருக்கிறது. ஆகவே நான் உங்ககிட்ட் கேட்டுக்கிறது என்னன்னா நீங்க அன்பும் பாசமும் நிறைந்த கணவனாய் உங்க மனைவியின் உணர்வினை புரிந்தவராய் இருக்க வேண்டும்.

டாக்டர் பேசியதை கேட்டபின்னர் நான் வெகுவாக மாறி இருந்தேன். நீங்க நம்பினா நம்புங்க மூன்று மாதம் பின்னர் என் மனைவி என் மீது பிரியம் அதிக காட்டினார். இனி பிரியம் அகன்றுவிடாது இருக்க பாசத்துடன் இருந்தேன்.

முற்றும். 

Post a Comment

Monday, 3 March 2014

தாலேலோ ஆண்டாள்

அடேங்கப்பா ஆண்டாள் - 5

விஷ்ணுசித்தர் வில்லிபுத்தூரில் முகுந்த பட்டருக்கும், பத்மவல்லி அம்மையாருக்கும் பிறந்த ஐந்தாவது புதல்வர். முகுந்த பட்டரும், பத்மவல்லி அம்மையாரும் வடபெருங்கோவிலுடையானிடம் ஆழ்ந்த பக்தி கொண்டு இருந்தார்கள். வேத விற்பன்னராக முகுந்தபட்டார் திகழ்ந்தார்.

விஷ்ணு சித்தரை ஒரு அந்தணர் போலவே வளர்த்தது முகுந்தபட்டர்தான். மற்ற குழந்தைகள் பற்றி எங்கேனும் குறிப்பு இருக்கிறதா, என்ன ஆனார்கள் என்பது குறித்த ஆராய்ச்சி இங்கே அவசியமற்று போகிறது. விஷ்ணுசித்தர் தன்னை ஒரு வைஷ்ணவராய் உருவகித்து பரமனுக்கு கைங்கர்யம் செய்வதில் நாட்டம் கொண்டு வந்தார். எந்தவகையான கைங்கர்யம் சிறப்பு என நினைத்தபோது மாலைகள் அணிவித்து மகிழ்ந்திருப்பது என எண்ணினார் விஷ்ணுசித்தர்.

ஒரு பூந்தோட்டம் அமைத்திட பெரும்பாடுபட்டு குளங்கள் எல்லாம் உருவாக்கி நந்தவனம் உருவாக்கினார். அங்கே எல்லா பூக்களும் பூத்து குலுங்கின. துளசி, தாமரை, முல்லை, மல்லிகை அழகு சேர்த்தன. அம்மலர் வாசனையை தான் நுகரக்கூடாது என நாசிகளை துணிகளால் மூடி மாலையாக்கி வடப்பெருங்கோவிலுடையானுக்கு சமர்ப்பித்து வந்தார்.

பாண்டிய நாட்டின் அரசன் வல்லபதேவன் மறுமையில் பேரின்பம் பெற என்ன வழி என ஒரு அந்தணரை சந்தித்ததால் உண்டான சிந்தனையில் வித்வான்களைத் திரட்டிட பறை அறிவித்து பெரும் பொருளை ஒரு வஸ்திரத்தில் கட்டி பொற்கிழியை ஒரு தோரணத்தில் தொங்கவிடப்பட்டது. எவர் மறுமையில் பேரின்பம் பெற இம்மையில் வழி சொல்கிறார்களோ அவர்கள் பொற்கிழி எடுத்துச் செல்லாமல் என அறிவித்தான்.

அன்றைய காலத்தில் புலவர்களுக்கு வேத விற்பன்னர்களுக்கு எப்போதும் ஒருவித போட்டி இருந்து கொண்டே இருப்பதாகவே வரலாறு குறிக்கிறது. முகுந்தபட்டர் விஷ்ணு சித்தருக்கு வேத சாஸ்திரங்கள் கற்று தந்து இருக்கக்கூடும், ஆனால் வேத சாஸ்திரங்கள் மூலம் இறைவனுக்கு கைங்கர்யம் செய்யாமல் மாலைகள் மூலம் மட்டுமே செய்துவந்தவர் விஷ்ணுசித்தர்.

பாண்டிய மன்னன் அறிவித்தமை கண்டு விஷ்ணுசித்தர் நிச்சயம் நினைத்து இருக்கக்கூடும். தந்தை கற்று தந்த கல்வி மனதில் ஓடியிருக்கும். ஆனால் இறைவனே விஷ்ணுசித்தரின் கனவில் வந்து பொற்கிழி அறுத்து வரும்படி சொல்லப்பட்டு இருக்கிறது. விஷ்ணுசித்தர் இறைவன் தம்மை வைத்து காரியம் நடத்த இருக்கிறார் எனும் உறுதி கொண்டு மதுரைக்கு கிளம்புகிறார்.

விஷ்ணுசித்தர் குறித்து வல்லபதேவன் தனது அவையில் இருந்த அந்தணர் செல்வநம்பிகள் மூலம் அறிந்து  இருந்தான். இப்போது வெறும் மாலைகள் மட்டுமே அணிவித்த ஒரு அந்தணர் ஒரே நாளில் பாண்டித்யம் பெறுவது கற்பனைக்கு அப்பாற்பட்ட விஷயம். சாஸ்திரங்கள் தெரியாத ஒருவரை இந்த அவையில் அனுமதிப்பது தவறு என்றே மற்ற அந்தணர்கள் போர்க்கொடி தூக்குகிறார்கள். இறைவன் அருளிச்செய்த சாஸ்திரங்களை விஷ்ணுசித்தர் சொல்லி முடிக்கிறார். நாராயணனே பரம்பொருள் என்பதாக அது அமைகிறது.

விஷ்ணுசித்தர் பட்டர்பிரான் என அழைக்கப்பட தருணம் அது. பல்லாண்டு பல்லாண்டு பல்லாயிரத்தாண்டு பாடிய பட்டர்பிரான் பரம்பொருளால் பெரியாழ்வார் என அழைக்கபட்டார் என்கிறது சேதி. இப்படி வாழ்ந்து வந்த பெரியாழ்வார் கண்ணனை தன்னை ஒரு யசோதாவாக பாவித்து பல பாடல்கள் இயற்றினார்.

தன்னை அன்னையாக வர்ணித்த பெரியாழ்வார் துளசி செடிக்கு அடியில் ஐந்து வயது குழந்தையாய் கண்டெடுக்கப்பட்டவர் ஆண்டாள். கண்ணனை குழந்தையாக, தன்னை தாயாக பாவித்து வர்ணிக்கும் பெரியாழ்வார் கண்டு ஆண்டாள் தனது காதலனாக கண்ணனை சித்தரித்தாள். சின்ன குழந்தையாய் ஆண்டாள். ஆண்டாள் வளர வளர அவள் கண்ணனும் வளர்கிறான் என்றே மனதில் பாடம் கொண்டாள்.

ஆண்டாள் செய்கை கண்டு பெரியாழ்வார் இப்படித்தான் பாடி வைக்கிறார்.

காறை பூணும் கண்ணாடி காணும் தன்
கையில் வளை குலுக்கும்
கூறை உடுக்கும் அயர்க்கும் தன்
கொவ்வைச் செவ்வாய் திருத்தும்
தேறி தேறி நின்று ஆயிரம் பேர்த்
தேவன் திறம் பிதற்றும்
மாறில் மாமணி வண்ணன் மேல் இவள்
மால் உருகின்றாளே

பெரியாழ்வார் போலவே ஆண்டாளும் பாடி முடித்து இருப்பாள். 'வில்லிபுத்தூர் விட்டு சித்தன் விரும்பிய சொல்' என்பார் பெரியாழ்வார். 'பட்டர்பிரான் கோதை சொன்ன சங்கத்தமிழ் மாலை' 'புதுவையர்கோன் விட்டு சித்தன்கோதை' என்பார் ஆண்டாள்.

தாலேலோ ஆண்டாள், இளம் பிராயத்தில் அப்படியே உள்வாங்கி உன்னையே மாற்றிக் கொண்டாய்

(தொடரும்)


Post a Comment

Sunday, 2 March 2014

காதல் மட்டும் - ட்விட்டர் கதை

கதை எனக்கு எழுத தெரியாது என்பது வேறு விசயம். எனக்கு இந்த அலங்காரம், விவரிப்பு எல்லாம் சற்று தூரம். ஏதோ மனதில் எழும் சிந்தனைகளை அப்படியே வரிகளாக்கி கட்டுரை வடிவம் எனவும் சொல்ல முடியாது, கதை எனவும் சொல்ல முடியாது, இரண்டையும் சோற்றில் ரசத்தையும், மோரையும் கலந்து சாப்பிடும் ஒரு சாமான்யனின் ரசனை தான் எனது சிந்தனை.

நான் எழுதிய, எழுதும் பெரும்பாலான கதைகள் எல்லாம் இப்படி ஒவ்வொரு பாகம் இணையத்தில் எழுதி பின்னர் தொடர்ந்ததுதான். எழுதி முடித்த பாகத்தில் இருந்து அடுத்த பாகம் எடுப்பேன். ஆனால் கதையின் கரு பெரும்பாலும் ஒரு வரிக்கதை மட்டுமே. இப்படி சமீபத்தில் அவ்வப்போது டிவிட்டரில் சின்ன கதை சொல்வதுண்டு. எவர் ரசிக்கிறார்கள் என்றெல்லாம் பார்ப்பதே இல்லை. எழுதி இருப்பதே என் பணி. அப்படித்தான் நேற்று ஒரு சின்ன கதை தொடங்கியது. காதல் போதும். அந்த கதை அப்படியே பெரிதாகி போனது. அது ஒரு வரிக்கதை போலத்தான். எழுதிக்கொண்டே கதாபாத்திரங்களை திணித்தேன்.

ட்விட்டரில் ஒவ்வொருமுறை 140 எழுத்துகள் மேல் எழுத இயலாது. சட்டென எழும் சிந்தனையை அப்படியே வடிக்க முடியாது. எழுதி அதில் வார்த்தைகள் நீக்கி அப்பப்பா என்னவொரு கொடுமை. ஆனால் வித்தியாசமாக உணர்ந்தேன். வந்து விழும் வார்த்தைகளின் சாரம் என்னை ஒருமுறை எதற்கு இந்த முட்டாள்தனம் என்றே எண்ண வைத்தது. ஆனாலும் எழுதியே ஆக வேண்டும் என இரண்டு நாட்கள் குறித்து கொண்டேன். அந்த கதை இப்படித்தான் தொடங்கியது. காதலன் காதலியிடம் கல்யாணம் பண்ணிக்கொள்ள சொல்ல காதலியோ காதல் போதும் என்கிறாள். அதில் இருந்து அந்த காதல் மட்டும் இப்போது உங்கள் பார்வைக்கு.

----------------------------------------------------------------------------------------------------------------------------
                                                            காதல் மட்டும் 

ஒருமுறை நீயும் நானும் தனியாக நடந்து கொண்டு இருந்தோம். உன்னை நோக்கி என்னை கல்யாணம் பண்ணிக்கொள் என்றேன். நீ காதல் போதும் என்றாய். ம். காதல் போதும். 1

எனக்கு திருமணத்திற்கு வேறொரு பெண் பார்க்கிறார்கள் என்றேன். உனக்குப் பிடித்த என்னை வேறு எவருக்கும் பிடிக்காது என்றாய் சிரித்துக்கொண்டே. காதல். 2

வீட்டில் சென்று நம் காதலை சொன்னேன். சரி, வா பெண் பார்க்க போகலாம் என்றார்கள். இல்லை, இல்லை, நாங்கள் காதலித்துக்கொண்டே இருக்கப் போகிறோம் என்றேன். 3

கல்யாணம் பண்ணித்தான் ஆக வேண்டும் என வீட்டில் அடம்பிடித்தார்கள். சரி என பெண் பார்க்க உன் வீடு வந்தோம். காதல் மட்டும் என்றாய் 4

கல்யாணம் பண்ணிக்கொண்டு தொடர்ந்து காதலியுங்கள் என்பதையும் மறுத்தாய். என் பெற்றோர்களும் உன் பெற்றோர்களும் ஏமாற்றம் அடைந்தார்கள். 5

எவ்வளவோ சமாதானம் சொல்லியும் காதல் மட்டும் என நீ நின்றாய். என்ன காரணம் என தெரியாமல் நாங்கள் கிளம்பிச் சென்றோம் கலக்கத்துடன். 6

வேறு பொண்ணு பார்ப்போம் என வீட்டில் சொன்னார்கள். முடியாது என மறுத்துவிட்டேன். அம்மாவும் அப்பாவும் அடைந்த கோபம் கண்டு மிரண்டேன். 7

இடமாற்றம் அவசியம் என வேறு வேலை தேடி தேடிக்கொண்டேன். நீ என்னுடன் வர மறுத்தாய். உன்னுடன் இருந்த தொடர்புக்கு இடைவெளி வந்தது. 8

இரண்டு வருடங்கள் பின்னர் என் தங்கையின் திருமணத்திற்கு ஊருக்கு வந்து இருந்தேன். நீயும் வந்து இருந்தாய். நம் கண்கள் கலங்கியது. 9

திருமணம் பண்ணிக்கொள்ளலாமா என்றே கேட்டேன். இல்லை, காதல் மட்டும் என்றாய். அன்று என்னை வீட்டில் அதிகமாகவே திட்டினார்கள். 10

என் தங்கைக்கு மணம் முடித்த உறவுக்கார பெண் ஒருத்தியை எனக்கு மணம் முடிக்க முயற்சித்தார்கள். மறுத்தேன். வேலை என கிளம்பினேன். 11

வா என மீண்டும் உன்னை அழைத்தேன். நீ காதல் மட்டும் என வர மறுத்தாய். எத்தனையோ பெண்களைப் பார்க்கிறேன். உன்னைப் போல எவருமில்லை. 12

உனக்கென கொஞ்சம் பணத்தை எடுத்துக் கொடுத்தேன், சில பரிசு பொருட்களுடன். எதையும் நீ ஏற்றுக்கொள்ளவில்லை. எவருக்கும் தர மனம் விருப்பமில்லை. 13

என் தங்கைக்கு வளைகாப்பு என ஊருக்கு வந்தபோது நீயும் அங்கு வந்து இருந்தாய். புதிய வேலை ஒன்றில் சேர்ந்து இருப்பதாக சொன்னாய். 14

இப்பொழுது திருமணம் செய்து கொள்ளலாம் என்றேன். காதல் மட்டும் என்றாய். எனக்கு அதற்கான அர்த்தம் தெரிந்து கொள்ள ஆவல் பிறந்தது. 15

தெய்வீகம் என்றால் என்ன என என்னிடம் கேட்டாய். பதில் சொல்லமுடியாமல் உன் விழிப்பார்வையில் திணறினேன். நீயே சொல் என்றேன். 16

சாத்திரம், சடங்கு, வழிபாடு எனும் இடிபாடுகளுக்கு இடையில் சிக்கிக்கொள்ளாத தூய்மை, உண்மை, தெய்வீகம் என்றாய். மிகவும் பிடித்து இருந்தது. 17

கல்யாணம் ஏன் வேண்டாம் என்கிறாய் என்றேன். சாத்திரம், சடங்குகளில் உனக்கு விருப்பம் இல்லை என்றாய். சரி, சேர்ந்து வாழ்வோம் என்றேன். 18

காதல் மட்டும் என்றே, சரி என வேலை இடம் சென்றேன். தங்கைக்கு பெண் குழந்தை பிறந்தபோது, பின் மொட்டை எடுத்தபோது ஊர் வந்தேன். 19

நான் கல்யாணம் பண்ணினால் தான் நீ கல்யாணம் பண்ணுவாய் என என்னிடம் வீட்டில் சொன்னார்கள். உன் பெற்றோர்கள் வந்து என்னிடம் அழுதார்கள். 20

நான் என்ன செய்வது உங்கள் மகள் திருமணம் வேண்டாம் எனும்போது எப்படி என்னால் திருமணம்  செய்ய இயலும். வேறு மணவாழ்வு எனக்கு வேண்டாம். 21

அவர்களின் கண்ணீர் எனக்கு வலிக்கிறது என உன்னிடம் மணம் செய்து கொள் என மறுபடியும் கேட்டேன். காதல் மட்டும் என்றாய். ம்ம் என்றேன். 22

சில வருடங்கள் பின்னர் உன்னிடம் இருந்து எனக்கு ஒரு கடிதம் வந்தது. உனது எழுத்துகளை என் கண்ணில் ஒற்றிக் கொண்டேன், கடிதம் திறந்து. 23

அன்புள்ள காதலுக்கு என்று தொடங்கி இருந்தாய், அதுதான் உனது முதல் கடிதம், அதுதான் எனது முதல் வாசிப்பு. திருப்பி திருப்பி வாசித்தேன். 24

அந்த கடிதம்தனில் உனக்காக நான் சேமித்து வைத்த பணமும் பரிசுப்பொருளும் அனுப்ப சொல்லி இருந்தாய். மனம் திக்குமுக்காடிப் போனது. 25

அவை எல்லாம் ஒரு குழந்தைகள் காப்பகத்தில் தர அனுமதி கேட்டாய். ஆசையுடன் எல்லாம் அனுப்பி வைத்தேன். அன்புள்ள காதலுக்கு நன்றி என. 26

அன்புள்ள காதலுக்கு நன்றி என பதில் கடிதம் வந்தது. பாதுகாத்து வைத்தேன். சில மாதங்கள் பின்னர் ஊருக்கு வர நினைத்தேன். அதிர்ந்தேன். 27

உனது சகோதரனும், உனது அண்ணியும் சேர்ந்து உங்கள் மூவரையும் வீட்டைவிட்டு வெளியேற சொன்னார்கள் எனும் செய்தி கேட்டு கிளமிபினேன். 28

நான் வந்து சேர்வதற்குள் என் வீட்டில் உங்களை தங்க ஏற்பாடு செய்து இருந்தேன். ஏற்றுக்கொண்டாய் இம்முறை திருமணம் நினைத்தேன். 29

உனது பெற்றோர்கள் என்னைக்கண்டதும் கையெடுத்து கும்பிட்டார்கள். பல விபரங்கள் சேகரித்தேன். அண்ணனுடன் வழக்கு வேண்டாம் என்றாய் 30

திருமணம் முடிக்கலாம் என்றேன். காதல் மட்டும் என்றாய். உன்மீது எனக்கு கோபமே வரவில்லை என்பது எனக்கு இன்னமும் ஆச்சரியம். ம்ம் என்றேன்.  31

சில நாட்களில் ஒரு வீடு பார்த்து உங்களைத் தங்கி இருக்க வைத்துவிட்டு வேலைக்கு திரும்பினேன். எனக்கு வயது முப்பத்திரண்டு தொட்டது. 32

அவள் என்ன நினைத்தாளோ ஏது நினைத்தாளோ என்னிடம் பிரியமாக பழகிடவே செய்தாள். நான் நட்பு என குறித்தேன். அவள் காதல் என குறித்தாள் 33

நமது முழுக்கதையும் அவளிடம் சொல்லும் நிர்பந்தம் எனக்கு ஏற்பட்டது. கதை கேட்டு கண்ணீருடன் விலகினாள். நம் காதல் அருமை கண்டேன். 34

சில வருடங்கள் பின்னர் ஊருக்கு வந்தேன். என் அம்மா நோய்வாய்ப்பட்டு இருந்தார். தான் சாகும் முன் என் திருமணம் என்றார். 35

கலங்கிய விழிகளுடன் உன் வீடு வந்தேன். உன் தந்தை நோய்வாய்பட்டு இருந்தார். என் தாய், உன் தந்தை வேண்டுதல் நிறைவேற்றுவோம் என்றேன். 36

கலங்கிய விழிகளுடன் காதல் மட்டும் என்றாய். உன் தந்தை கரம்பிடித்து மன்னிப்பு கேட்டு என் வீடு வந்து சேர்ந்தேன். என் அம்மாவின்... நிலை 37

ஊருக்கு வந்த என் தங்கை என்னுடன் ஏகத்துக்கும் சண்டை போட்டாள். என்னத்த அவகிட்ட கண்ட என கத்தினாள். காதல் மட்டும் என்றேன். 38

பெத்த தாய் உசிரவிட காதல் பெரிசா ஒரு கல்யாணம் பண்ணித்தொலை என்ற அவளின் சொல்லில் அதிர்ந்தேன். அவளின் திருமணவாழ்வு பற்றி கேட்டேன். 39

எனக்கென்ன நல்லாத்தான் இருக்கேன். இப்படியா கிடக்கிறது எனும் அவளின் அவளுக்கு நியாயம். அன்று இரவு என் அம்மா உயிர் பிரிந்தது. 40

நீ கதறி அழுத காட்சி என்னை என்னவோ செய்தது. ஈமகாரியங்கள் முடித்த பின்னர் வேலை செல்ல கிளம்பினேன். அப்பா என்னுடன் வர மறுத்தார். 41

தங்கையிடம் அப்பாவை அழைத்து போக சொன்னேன். அங்க என்ன வாழுது என்றாள். அம்மாவின் நகைகள், புடவைகள் எல்லாம் என் தங்கைக்கு என ஆனது. 42

அப்பாவை அழைத்துச் செல்ல தங்கை மறுத்த கணத்தில் அப்பா உடன் செல்ல மறுத்தார். நீயும் அங்குதான் நின்று இருந்தாய். உன்னை பார்த்தார். 43

பெத்தது நீங்க உங்க வழினு போயீட்டீங்க, பெறாத மகளா எங்களை கண்ணுக்குள்ள வைச்சி பாத்துக்குச்சி என உன்னை கைகாட்டி குலுங்கி அழுதார். 44

எனக்கு அப்போது சுர் என தைத்தது. வலித்தது. அம்மாவின் தாலிக்கொடி எடுத்து எனதாக்கினேன். தங்கை இனிமேல் வரமாட்டேன் என்றாள் 45

என் அப்பா, நீ எப்படி எல்லாம் என் அம்மாவை பார்த்துக் கொண்டாய் என சொல்லி மறுபடி அழுதார். நீ வேறொரு அறை சென்று மிச்சம் அழுதாய். 46

உன்னை தேற்றிட நன்றி சொல்லிட எங்கே வார்த்தைகள் தேடுவேன். பார்த்துக்கோங்க என சொல்லிவிட்டு வேலைக்கு சென்றேன். இனம் புரியாத வலி 47

மேலாளரிடம் வேலையை ராஜினாமா செய்வதாக சொன்னேன். அவர் என்னை சத்தம் போட்டதில் மொத்த அலுவல சுவர்களும் விரிபட்டன. கண்ணில் முழிக்காதே. 48

என சொன்ன வார்த்தையில் சட்டென எழுந்தேன். வீடு வந்தேன். எல்லாம் எடுத்து வைத்த தருணத்தில் ஒரு அழைப்பிதழ் வந்து இருந்தது. 49

என்னிடம் காதல் சொன்ன தோழியின் கல்யாண அழைப்பிதழ் அது. வாழ்க்கை. என்ன சார் இப்படி திடுதிப்னு போறீங்க என்றார் வீடு தந்தவர். 50

விளக்கம் சொல்ல மனமில்லை. ஊருக்கு திரும்பி வந்து அப்பாவுடன் அன்றுதான் மனம்விட்டு பேசினேன். கல்யாணம் பண்ணிக்கோப்பா. வயது முப்பத்தி எட்டு. 51

பிரம்மச்சரியம் என்பது தவம். எவ்வித கறையின்றி நான் வாழ்வதற்கு நீ துணை. உன்னை முதிர்கன்னி என்றே பிறர் சொன்னாலும் காதல் இளமை நீ. 52

உன் அப்பாவின் நிலைமை மோசமாகியது. மருத்துவ பலனின்றி மற்றொரு உயிர் போனது. நீ மனம் மாறவே இல்லை, நானும் மனம் மாறிக் கொள்ளவில்லை. 53

நீயும் உன் அம்மாவும் குழந்தைகள் காப்பகம் சென்று தங்கி வேலை பார்க்க இருப்பதாக சொன்னாய். எனக்கும் சரி என்றானது, அப்பாவுக்கும் கூட 54

துள்ளித்திரிந்த குழந்தைகள் பார்த்து சொன்னேன். இந்நேரம் நமக்கும் இப்படி குழந்தைகள் இருக்கும் என. காதல் மட்டும் என்றே சிரித்தாய். 55

தாய்மை என்பது ஒரு பெண்மையின் அடையாளம். அந்த தாய்மை உணர்வு வேண்டாமா என்றேன். சின்ன குழந்தையை அள்ளியணைத்து காதல் அன்னை என்றாய் 56

விக்கித்து நின்றேன். மற்றொரு குழந்தையை அள்ளியணைத்தேன் நான். எங்கெங்கோ சென்று நிராதவற்ற  குழந்தைகளை கொண்டு வந்தாய். பணி பெரியது. 57

உன் அம்மாவும், என் அப்பாவும் இறந்து போனார்கள். ஐம்பது தொட்டு இருந்தேன். கல்யாண பேச்சு நான் பேசவே இல்லை. வாழ்க்கை வீணாகவே இல்லை. 58

பிரம்மச்சரிய வாழ்க்கை எதற்கு என கேட்டேன். கல்யாணம் பண்ணி குழந்தைகள் பெற்று வாழ்ந்து பின்னர் தனித்து விடப்படுவது கொடுமை என்றாய் 59

எனக்கு அதன் அர்த்தம் புரிந்தது. இருப்பினும் இது மானுட வாழ்க்கை அல்லவே. காதல் புரிந்து கல்யாணம் பண்ணி இல்லறமே நல்லறம் என்றேன். 60

அது சாதாரண மனிதர்கள் செய்வது. உனக்கு அதில் உடன்பாடு இல்லை என அழுத்தமாக சொன்னாய். என்றோ சொன்ன தெய்வீக விளக்கம் இன்று உரைத்தது. 61

மனதுக்குப் பிடித்தவர்கள் பலர். காதல் என்பது ஒருவருடன் மட்டுமே. அந்த காதல், கல்யாணம் எனும் சடங்குக்கு உட்பட்டால் களங்கம் என்றாய்  62

கலவியில் ஈடுபட்டு சுகித்திருப்பது காதல் இல்லை. இனப்பெருக்கம் செய்ய பிறந்த பிறவிகள் இல்லை நாம். காதல் மட்டும் புரிந்திடவே நாம். 63

நீ சொன்னபோது நான் புரிந்து கொண்ட அர்த்தம் சரியே, இல்லையெனில் காதல் மட்டும் என நீ சொன்னபோது ம்ம் என தொடர்ந்து போயிருக்க மாட்டேன். 64

இப்படியே அனைவரும் நினைக்க பிரபஞ்சம் என்ன ஆகும் என்றேன். என் கண்களை பார்த்துக் கொண்டே இருந்தாய். நான் அதில் கலங்கி இருந்தேன். 65

இவ்வுலகம் எப்படி உருவானது என்றே கேட்டாய். அம்மா என ஓடிவந்து ஒரு குழந்தை உன்னை கழுத்து அணைத்து பின்னால் வந்து கட்டிக்கொண்டது 66

அந்த குழந்தையை உச்சி முகர்ந்து என்ன என கேட்டாய். சாமி கும்பிட வாம்மா என்றது. சட்டென வாங்க என என்னை அழைத்து சென்றாய். புதிர். 67

என்றுமில்லாமல் என்ன கும்பிட்டாய் என்றேன். இந்த பிரபஞ்சத்தில் கடவுள் ஒரு புதிர். உயிர் இன்னொரு புதிர் என்றதோடு ஏதுமில்லை என்றாய் 68

இந்த உலகம் கடவுள் படைத்தது என் புரிதல் என்றேன். சிரித்தாய். என்ன என்றேன். என்னை ரசிக்கிறேன் என்றாய். இத்தனை வருடங்கள் இதேதான். 69

அதற்கு பின்னர் நீ சொன்ன விஷயம் கேட்டு அதிர்ந்தேன். அப்படி நடக்க சாத்தியமில்லை என்றுதான் எனக்குத் தோணியது. ஒரு செல் உயிரி சரி. 70

எப்படி இப்படி நீ சிந்தித்தாய்? பல செல்கள் கொண்ட உயிரி தானாக பல்கி பெருகும் காலநிலை ஒன்று வரும் எனவும் அங்கே காதல் மட்டும் என 71

பல செல்கள் உயிரியில் இருக்கும் ஸ்டெம் செல்கள் பருவகாலத்தில் உடலில் இருந்து உதிர்ந்து புதிய அதேபோல உயிரிகள் தோன்றும் என்றாய் 72

விதை இல்லாத மரம் சாத்தியமில்லை என்றேன். தண்டு வெட்டி மரம் வளரும் என்றாய். அன்று பேசியது. இன்று எனக்கு 65. நடை தளர்ந்தது. 73

மணமுடிக்காமல் காலம் காதலினால் மட்டுமே கடந்தது. ஏதேனும் உன் மீது வருத்தம் இருக்கிறதா என்றாய். காதல் மட்டும் என்றேன். ரசித்தாய். 74

உடலைவிட்டு உயிர் பிரியும் காலம் நெருங்கியது. நீ ஆவலோடு இதோ அறிவியல் கண்டுபிடித்துவிட்டது, பல செல்கள் உயிரி தானாக பல்கும் என்றாய்  75

பரிணாமத்தில் ஒரு மாற்றம் நிகழும். இனப்பெருக்க உறுப்புகளற்ற உயிரிகள் தோன்றும் என ஏதேதோ தள்ளாத வயதில் சொன்னாய். காது கேட்டது 76

ஆனால் இந்த உலகம் இப்படியே இருந்தால் தான் சுவாரஸ்யம். காதல் புரிவது அதிசயம். அதிலும் காதலுக்கு மட்டும் வாழ்வது ஆச்சரியம் என்றேன். 77

மலர்ந்த முகத்துடன் கண்கள் மூடினாய். உன் விழிப்பார்வையில் இனி நான் விழமாட்டேன் என எண்ணியபோது என் கண்கள் மூடியது. காதல் மட்டும். 78

முற்றும். 

-----------------------------------------------------------------------------------------------------------------

இந்த கதையை இங்கே எழுதியபோது எனது மறுபதிப்பு எனும் ஒரு சின்ன கதை நினைவுக்கு வந்தது. அதாவது வரிகள் மடக்கி வசன கவிதையில் எழுதப்பட்ட ஒரு சிறுகதை அது. அது இங்கே பதிந்து இருப்பேன் என்றே நினைக்கிறேன். இல்லையெனில் தேட வேண்டும். அந்த கதை இதேபோல வசனத்தில் மட்டுமே அமைந்து இருக்கும்.

ஒரு ஆண்டாள் எப்படி திருவரங்கன் எனும் இறைவனை அடைய போராடினாள் என்றும் அவள் அடைந்தே தீர்ந்தாள் என்றும் இலக்கியம் பேசி செல்லும். அது சாத்தியமா என்றெல்லாம் எவரும் எண்ணிப்பார்ப்பது இல்லை.

இதே கதை நடக்க சாத்தியமா என்றால் எதற்கு சாத்தியமில்லை என்றே எண்ண தோணுகிறது. தான் நேசித்த காரணத்திற்காக தனது காதலி கிடைக்காத பட்சத்தில் கடைசி வரை மணம் முடிக்காமல் வாழ்ந்து முடித்த மனிதர்கள் இவ்வுலகில் உண்டு.

இவர்கள் எங்கேனும் இருப்பார்கள்! இவர்களால் பல நிராகரிக்கப்பட்ட குழந்தைகள், முதியோர்கள் வாழ வைக்கப்பட்டு கொண்டு இருப்பார்கள்.

காதல் மட்டும்.


Post a Comment